ཁང་ཚན་ཤེས་ཡོན་དང་འབྲེལ་བའི་ལས་འཆར།

    They got Award for the outstanding achievement in memorisation of classical texts.   Congratulation to all of u.    Keep it up.

འཛམ་བུ་གླིང་པའི་བྱམས་བརྩེའི་མངའ་བདག ཤར་ནུབ་ཡོངས་ཀྱི་མ་འདྲིས་པའི་མཛའ་ཤེས། རང་ཅག་གངས་ཅན་པ་རྣམས་ཀྱི་དཔྲལ་བའི་མིག་དང་ཁོག་པའི་སྙིང་ལྟ་བུ། ༸སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་དགུང་གྲངས་བརྒྱད་བཅུར་ཕེབས་པའི་གྱ་སྟོན་སྲུང་བརྩི་ཞུས་པ་ནས་བཟུང་འདི་ལོ་བར་སྤྱིར་འཛམ་གླིང་ཡུལ་གྲུ་གང་སར་༸རྒྱལ་བའི་བཀའ་དྲིན་རྗེས་དྲན་གྱི་ལས་འགུལ་མང་དག་སྤེལ་ཡོད་ལ། ལྷག་པར་དུ་རི་བོ་དགེ་ལྡན་པའི་གདན་ས་སེར་འབྲས་དགའ་གསུམ་གཙོ་བོར་གྱུར་བའི་དགེ་ལུགས་ཡོངས་ཀྱིས་ཀྱང་༸རྒྱལ་བའི་བཀའ་དྲིན་རྗེས་དྲན་མཚོན་བྱེད་དུ་གཞུང་ཆེན་ཁག་ལ་བགྲོ་གླེང་དང་། མ་ཟད་གདན་ས་ཁག་གི་ནང་བཀའ་པོད་ལྔའི་རྩ་བ་དང་། དེ་བཞིན་འགྲེལ་པ་དོན་གསལ། དྲང་ངེས་ལེགས་བཤད་སྙིང་པོ། དབུ་མ་རིགས་ཚོགས་དྲུག་ལ་སོགས་པའི་བློ་འཛིན་རྒྱུགས་ཕུལ་ཚད་ལྡན་སྤྲོད་མཁན་ཇི་ཡོད་མགོན་པོ་གང་ལ་སྙན་གསེང་ཞུས་ཡོད་པའི་ཁོངས། འདི་ག་དགའ་ལྡན་ཤར་རྩེ་ལྷོ་པ་ཁང་ཚན་གྱི་སློབ་གཉེར་བ་ཁག་གཅིག་གིས་ཉིན་ཞག་ཟླ་ལ་བརྒྱུད། ཟླ་བ་ལོ་ལ་བརྒྱུད་ནས་ཀློག་པ་ཐོས་བསམ་དང་སྤོང་བ་བསམ་གཏན་ལ་རྩེ་གཅིག་ཏུ་གཞོལ་བའི་འབྲས་རྟགས་སུ་གཞུང་ཆེན་ཁག་གི་རྩ་བ། སྤྱོད་འཇུག་ཆེན་མོ། འགྲེལ་བ་དོན་གསལ། དྲང་ངེས་ལེགས་བཤད་སྙིང་པོ་སོགས་ཚད་དང་ལྡན་པའི་རྒྱུགས་ཕུལ་ཟིན་པ་རྣམས་ལ་ད་རེས་རྒྱལ་བའི་བཀའ་དྲིན་རྗེས་དྲན་ལྷན་ཚོགས་ཀྱིས་ཟེངས་རྟགས་བྱ་དགའ་ཐོབ་ཡོད། དེར་བརྟེན་རང་ཁོངས་ཀྱི་དགེ་འདུན་པ་ཡོངས་ནས་ཁྱེད་ཅག་རྣམས་ལ་སྙིང་ཐག་པ་ནས་འཚམས་འདྲི་དང་། ཐུགས་རྗེ་བླ་མེད་དུ་ཆེ་ཞུ་བ་དང་སྦྲགས།  ཁྱེད་རྣམས་ཀྱི་༸རྒྱལ་བ་དགྱེས་པའི་དགེ་རྩ་རླབས་པོ་ཆེ་འདི་ལ་བརྟེན་ནས་འཛམ་གླིང་ཞི་བདེའི་ཁྱབ་པ། ཤེས་རབ་ཀྱི་སྣང་བ་རྒྱས་པ།  གཞིས་བྱེས་ལྷན་འཛོམས་ཡོང་བ། སླད་དུ་ཁྱེད་རྣམས་ཀྱི་གཙོས་རིས་མེད་སློབ་གཉེར་བ་ཡོངས་ཀྱི་འགལ་རྐྱེན་བར་ཆད་ཐམས་ཅད་ཞི་བ་དང་། བསླབ་པ་སློབ་གཉེར་མཐར་ཕྱིན་པའི་རྒྱུར་འགྱུར་པའི་རེ་འདུན་ཤུགས་དྲག་བཅས། དགའ་ཤར་ལྷོ་པ་ཁང་ཚན་ནས།